Etiketa: erlazioa

Zentzumenak zaintzeko aholkuak

Zentzumenen bidez inguruko informazioa jasotzen dugunez, zentzumenak kaltetzen dituzten bizi-ohiturak ekiditen ahalegindu behar gara. Jarraian gomendioetako batzuk dituzu:

Dastamena:  Janari oso hotzak edo oso beroak kaltetu dezakete dastamena. Arnasa ahotik hartzerakoan mingaina lehortzen da eta dastamenean eragin dezake. Alkoholak eta tabakoak dastamenaren gaitasuna gutxitzen dute, eta oro har, ahoa eta hortzen garbiketa sistematikoak dastamen osasuntsua mantentzen laguntzen du.

Entzumena: Entzumena kaltetzen duten hainbat ohitura aipatzen dute adituek:

  1. Belarriaren barruan ez sartu objekturik (giltzak, arkatzak…).
  2. Zarata handiko gune eta uneak ekidin (petardoak…).
  3. MP3, aurikularrak eta antzeko tresnak ahal den gutxien erabili, entzumen gaitasuna murrizten dute.
  4. Belarria garbitzeko itsas ura erabili. Ez sartu kotoia duen makila belarriaren barruan. Kanpoaldetik toalla muturrarekin garbitu.

Ikusmena:  Ikusmena osasuntsu izateko askotan garatzen ditugun hainbat ohitura ekidin beharko genituzke:

  1. Argitasun gutxirekin irakurri edota lanean aritu (miopia sortarazten du).
  2. Argitasun handitik babestu behar gara.
  3. Hizki oso txikiak dituzten liburuak ez irakurri denbora luzean.
  4. Irakurtzerakoan gutxienez 20 cm-tako tartea utzi.
  5. Ordenagailua edo antzeko tresnen aurrean denbora  asko ez igaro, ikusmena asko nekatzen du.
  6. Esku zikinekin ez ukitu begiak.

Ukimena: Ukimen osasuntsua izateko garbitasuna eta higieneko ohiturak erregularki mantentzea aholkatzen dute adituek.

Usaimena: Usaimena osasuntsu mantentzeko sudurrean objekturik ez sartu kaltegarria baita, hautsa, kea edota holako substantziak ekidin edota hauen aurrean sudurra babestu. Sudurra erregularki garbitzea (mukiak kendu…) garrantzitsua da usaimen ona izateko.

Entzumena

Entzumena da gure inguruko soinuak jasotzen dituen zentzumena.

Hotsak airean zehar belarriraino iristen dira eta, gero, belarriko zulotik tinpanoraino. Tinpanoa mintz bat da eta, hots-uhinek kolpatzen dutenean, bibratu egiten du. Bibrazio horrek belarri barruan dauden hiru hezurtxo (mailua, ingudea eta estriboa) mugitzen ditu. Hezur txiki horiek kokleara bidaltzen dituzte soinu-uhinak. Koklea nerbio batzuei lotuta dago eta nerbioek garunera bidaltzen dituzte seinaleak, garunak seinale horiek interpreta ditzan.

Ikusmena

Gizakiok ikusmena dugu zentzumenetatik garrantzitsuena. Berari esker bereiz ditzakegu gauzen kolorea eta itxura. Dena dela, guk ikusi ahal izateko behar-beharrezkoa da argia.

Argirik gabe ezinezkoa litzaiguke ikasturte honetan egin dugun bidaia miragarria egitea eta ikustea: unibertsoa, atmosfera, hidrosfera, litosfera, lurreko ekosistemak eta gizakia. Ikusi dugun guztia eguzkiaren argiari esker ikusi dugu.

Ikusmenaren organo nagusia begia da. Begiak baditu, gainera, bere hurbilean beste atal babesgarri batzuk: betazalak, bekainak, malko-guruinak, etab.

Begiaren azala edo pareta hiru geruzaz osaturik dago: esklerotika, koroidea eta betsarea (erretina).

Esklerotika. Kanpoaldeko geruza da, zuria eta gogorra, eta marruskaduren aurkako babesa ematen dio begiari.

Aurrealdetik gardena da, argiari pasatzen utzi ahal izateko, eta zati horri kornea deitzen zaio.

Koroidea. Begi-muina barrualdetik estaltzen duen mintz iluna da koroidea, eta begi-barnea ilun gordetzen du.

Koroidearen aurrealdea hainbat koloretakoa izaten da, pertsonen arabera. Irisa deitzen zaio mintz berezi horri. Irisaren erdigunean zulo bat dago, betsein edo begi-nini izenekoa.

Begi-nini hori beltza izan ohi da beti, hain zuzen argia pasatzen uzteko zuloa besterik ez delako. Begiaren barnealdea erabat beltza delako ikusten da beltza begi-ninia.

Betsarea edo erretina. Barne-barneko mintza da eta horixe bakarrik da argiarekiko sentikorra. Mintz horretan, betsarean, eratzen dira irudiak. Begi-nerbioarekin komunikatzen da betsarea, eta informazioa garunera bidaliz ikustea ahalbideratzen du.

Orain arte aipatutako hiru geruza horien barneko begi-globoaren barrunbea bi departamentutan zatiturik dago. Bata, kornearen eta irisaren artekoa, humore urtsua izeneko likidoz betea dago; bestea, betsarearen eta irisaren artekoa, humore beirakara izeneko likidoz betea.

Bi likidoen artean, juxtu begi-niniaren atzean, lente bikonbexu bat dago: kristalinoa.

Lente hori, kristalinoa, behar-beharrezkoa da, kristalinoan zehar pasatzen baitira betsareko zelulak inpresionatuko dituzten argi-izpiak.

Adina aurrera doan neurrian, askotan, kristalinoak gardentasuna galtzen du edo opaku bihurtzen da, halakoetan ikusmen-galtze bat gertatzen da, kataratak edo begi-lausoa izeneko gaixotasuna, alegia.

Usaimena

Usaimenaren bidez hainbat usain bereizten ditugu. Usainak bereizten dituzten zelula sentikorrak sudurzuloko usaimen mintzean (mintz pituitarioan) aurkitzen dira. Zelula horiek bidalitako kinada nerbiosoak sudur-nerbioen bidez garunera iristen dira.

Zentzumen hau oso garatuta dago zenbait animaliarengan, eta ez horrenbeste gizakiengan.

Usainen sailkapena egitea ez da gauza erraza. Honelako bat egin genezake: lurrintsuak edo atseginak, kiratsak edo usain txarrak eta usainak edo arruntak, ez txarrak ez gozoak.

Ukimena

Ukimenaren bidez gure inguruko gauzen forma, hotz-beroa eta bibrazioak jaso ditzakegu.

Azalak bi zati nagusi ditu: epidermisa edo kanpoaldea eta dermisa edo barnealdea. Azken atal hori da sentikorra dena. Hemen aurkitzen dira nerbioguneak eta hainbat organotxo kanpoko sentipenak jasotzeko. Ikusi hemen alboko marrazkia.

Ukimenaren sentikortasuna ez da berdina gorputz guztian. Alde sentikorrenak atzamar puntetan aurkitzen dira. Barneko organoetan ere baditugu sentipen-organotxoak, eta tendoi eta muskuluetan aurkitzen dira batik bat.

Dastamena

Dastamenaren bidez jaten ditugun janarien zaporeak bereizten ditugu. Janarien zaporeen sentipenak papilen bidez jasotzen ditugu, horiek kinada bihurtzen dituzte sentipenak, eta nerbioen bidez garunera bidali.

Kinada horiei erantzun ezberdinak eman ahal dizkie garunak, ahoko edo gorputzeko muskuluei esker. Honela, janari hori irents dezakegu, edo ahotik atera, gustukoa ez bazaigu.

Garunaren erabakia irenstea denean, digestioaren prozesuak aurrera dihardu, eta bai masailezurrek, bai mihiak eta bai faringeak, beren mugimenduekin, digestioko ahoko fasea osatzen laguntzen dute.

Papilak hainbat motatakoak izan daitezke beren izaera eta formen arabera. Mota bakoitzak zapore klase bat identifikatzen du (gozoa, garratza, mingotsa eta gazia).

 

Zentzumenak

Gizakiok mugitu eta mezuak jaso behar ditugu erlazionatzeko. Hezur, muskulu eta abarren laguntzaz mugitzen gara, eta kanpoko mezuak jasotzeko zentzumenak erabiltzen ditugu.

Zentzumenak arduratzen dira kanpotik jasotzen ditugun zirrarak (beroa, argia, kolorea…) kinada bihurtzen. Kinada horiek, nerbioen bidez, garunera bidaltzen dira eta garunak, muskulu eta hezurrei aginduak ematen dizkie zirrara horien aurrean egin beharreko mugimenduak egiteko (korrika, salto, eskua kendu, idatzi…). Horretarako zentzumen bakoitzak eginkizun bereziak ditu.

Gizakiok bost zentzumen ditugu: dastamena, ukimena, usaimena, entzumena eta ikusmena.